Mensajens di Páskua di Prufeta ta Insentiva Interasons Sima di Kristu

Prufeta y Prizidenti Dallin H. Oaks di Igreja di Jezus Kristu di Santus di Últimus Dias insentiva menbrus pa dimonstra amor puru di Kristu na tudu ses interason, na meiu di várius mensajens ki dadu duranti es fin di simana di Páskua y di konferénsia jeral.

“komu sigidoris di Kristu, ki nu sigi-L, na ivita kontenda y na uza linguajen y métudus di pasifikadoris," el fla.  “Na nos família y na otus rilason psual, nu ivita kel ki é duru y xeiu di ódiu.  Nu buska ser santu, sima nos Salvador.”

Na abertura di konferénsia mundial na sábadu palmanhan, dia 4 di abril di 2026, Prizidenti Oaks fla ma asenbleia soleni pa apoia novu Primera Prizidénsia é un “iventu di grandi inpurtánsia.”

“Mi é gratu pa N sta entri kes ki ses xamadu di lideransa ta rikunhesedu formalmenti d'es manera,” Prizidenti Oaks fla.  El spresa gratidon pa votu di apoiu di menbrus di Igreja, pa ses orason, ses apoiu y ses sirvisu pa otus algen.

“N'es épuka di Páskua, N ta torna afirma nos tistimunhu di Sinhor risusitadu y N ta rikunhesi ma El é kabésa d'es Igreja,” el fla.

“Krensa na un resureison literal y universal” ta muda vizon ki un algen ten di mortalidadi, el fla dumingu pamanhan, dia 5 di abril. Es krensa ta da-nu forsa, vizon y koraji óra ki nu ta infrenta difisiénsias fíziku ô dizafius di mortalidadi, sima morti.

Óra ki kada psoa ta sforsa pa vive dignu pa inkontra ku Kristu, “kel-li ta djuda-nu vive djuntu na amor n'es vida, ta spéra pa un runion y konvivénsia xeiu di alegria na vida futuru,” el inxina.

Au kontráriu di kultura “tóksiku” di oji, di agresividadi pa adversárius, Prizidenti Oaks insentiva menbrus pa sigi ensinamentus di Salvador di “ama Deus y nos prósimu” y “ama nhos inimigus.”

“Oji nu pode flaba ma nu resebi mandamentu di ama nos adversárius,” el fla.

Download Photo

“Komu sigidors di Kristu, nu debi buska vive na pás y na amor ku otus fidju di Deus ki ka ten mésmu valoris ki nos y ki ka ten obrigasons di konvéniu ki nos nu asumi,” el kontinua. Na un guvérnu dimokrátiku, nu debi buska ‘justisa pa tudu algen.’ Na munti situason, diskonfiansa ô mesmu agresividadi entri stranhus poku-poku ta da lugar pa amizadi óra ki kontatu psual ta kria ruspetu pa kunpanheru.”

Santus di Últimus Dias pode sigi izénplu di Kristu na skodje ama otus psoa, mésmu si otus psoa ka ta mostra amor pa nos, Prizidenti Oaks fla.

Pasifikadoris! Modi ki ta mudaba mundu si sigidors di Kristu dexaba di uza palavras duru y ki ta ofendi na tudu ses kumunikason,” el fla, y el partilha izénplus di modi ki un algen pode ser un pasifikador.

Na insera konferénsia na dumingu di tardi, Prufeta fla: “Spíritu di Senhor inspira-nu nos tudu pa nu konsentra nos adorason, foka nos aprendijen, y uni nos tistimunhu na ensinamentus di Sinhor Jezus Kristu y na planu di si Pai pa nos prugrésu y alegria iternu .”

El testifika: “di verdadi, Jesus Kristu é kaminhu pa pás n'es mundu, y vida iternu na mundu ki sta pa ben. El konxi y El ta ama kada un di nos perfeitamenti, y El ta konvida-nu pa nu anda ku El, pa nu fika ku El, y pa nu sigi Si izénplu di ministra otus psoa, un pur un, ku karidadi y amor. Nu lembradu di papel sentral di kazamentu y di famílias na planu di nos Pai Selestial pa distinu iternu di Ses fidju. Ki nu dimonstra amor puru di Kristu na nos famílias, na nos kumunidadi, y na tudu nos interason ku fidjus di Deus.”

Prizidenti Oaks tirmina ku un konviti pa nu studa y pondera na spíritu di orason mensajens di konferénsia, y dipôs pa nu aji ku fé na ses prinsípiu.  “Óra ki nu ta valoriza y nu ta poi na prátika ensinamentus d'es konferénsia, Sinhor ta kontínua ta inxina-nu y ta inspira-nu ku rivelason psual y orientason,” el fla.